MYS.2.167b
天地之初時久堅之天河原爾八百萬千萬神之神集々座而神分々之時爾指上日女之命天乎婆所知食登葦原乃水穂之國乎天地之依相之極所知行神之命等天雲之八重雲別而神下座奉之高照日之皇子波飛鳥之浄之宮爾神随太布座而天皇之敷座國等天原石門乎開神登座爾之可婆吾王皇子之命乃天下所知食世者春花之貴在等望月乃満波之計武跡食國四方之人乃大船之思憑而天水仰而待爾何方爾御念食可由縁母無真弓乃岡爾宮柱太布座御在香乎高知座而明言爾御言不御問日月之數多成塗刺竹之皇子宮人歸邊不知爾為
ame tuti no pazime no toki pisakata no ama no kapara ni ya po yorodu ti yorodu kamwi no kamu tudwopi tudwopi imasi kamu pakari pakari si toki ni sasi noboru pirumye no mikoto ame woba sira si myesu to asi para no midu po no kuni wo ame tuti no yoriapi no kipami sira si myesu kamwi no mikoto to ama kumo no ya pye kumo wakite kamu kudasi imase maturi si taka tera su pi no mi kwo pa tobu tori no kiywomi no miya ni kamu nagara putwo siki masite sumyeroki no siki masu kuni to ama no para ipa two wo piraki kamu nobori imasi ni sikaba wa go opo kimi mi kwo no mikoto no ame no sita sira si myesi se ba paru pana no taputwo kara mu to moti dukwi no tata pasi kye mu to wosu kuni yomo no pito no opo bune no omopi tanomite ama tu midu apugite matu ni ika sama ni omoposi myese ka ture mo na ki mayumi no woka ni miya basira putwo siki imasi mi ara ka wo taka siri masite asa gotoni mi koto twopa sa nu pi tukwi no mane ku nari nuru sasutake no mi kwo no miya pito yuku pye sira ni su