MYS.5.894
神代欲理云伝久良久虚見通倭國者皇神能伊都久志吉國言霊能佐吉播布國等加多利継伊比都賀比計理今世能人母許等期等目前爾見在知在人佐播爾満弖播阿礼等母高光日御朝庭神奈我良愛能盛爾天下奏多麻比志家子等撰多麻比天勅旨戴持弖唐能遠境爾都加播佐礼麻加利伊麻勢宇奈原能辺爾母奥爾母神豆麻利宇志播吉伊麻須諸能大御神等船舳爾道引麻遠志天地能大御神等倭大國霊久堅能阿麻能見虚喩阿麻賀気利見渡多麻比事畢還日者又更大御神等船舳爾御手打掛弖墨縄遠播倍多留期等久阿遅可遠志智可能岬欲利大伴御津浜備爾多太泊爾美船播将泊都都美無久佐伎久伊麻志弖速帰座勢
kamwi yo ywori ipi tute kuraku swora mitu yamato no kuni pa sumye kamwi no itukusi ki kuni koto dama no sakipapu kuni to katari tugi ipi tugapi kyeri ima no yo no pito mo kotogoto me no mapye ni mi tari siri tari pito sapa ni miti te pa aredomo taka pikaru pi no mikadwo kamu nagara mede no sakari ni ame no sita mawosi tamapi si ipye no kwo to erabi tamapite opo mikoto itadaki moti te morokwosi no topo ki sakapi ni tukapa sa re makari imase una para no pye ni mo oki ni mo kamu dumari usipaki imasu moromoro no opomi kamwi tati puna no pe ni miti biki mawosi ame tuti no opomi kamwi tati yamato no opo kuni mi tama pisakata no ama no mi swora yu ama gakeri mi watasi tamapi koto wopari kapyera mu pi pa mata sara ni opomi kamwi tati puna no pe ni mi te uti kake te sumi napa wo pape taru goto ku atikawosi tika no saki ywori opotomo no mitu no pama bwi ni tada pate ni mi pune pa pate mu tutumi na ku saki ku imasite paya kapyeri ma se