MYS.5.892
風雑雨布流欲乃雨雑雪布流欲波為部母奈久寒之安礼婆堅塩乎取都豆之呂比糟湯酒宇知須須呂比弖之匚夫可比鼻毘之毘之爾志可登阿良農比宜可伎撫而安礼乎於伎弖人者安良自等富己呂倍騰寒之安礼婆麻被引可賀布利布可多衣安里能許等其等伎曾倍騰毛寒夜須良乎和礼欲利母貧人乃父母波飢寒良牟妻子等波吟泣良牟此時者伊可爾之都都可汝代者和多流天地者比呂之等伊倍杼安我多米波狭也奈里奴流日月波安可之等伊倍騰安我多米波照哉多麻波奴人皆可吾耳也之可流和久良婆爾比等等波安流乎比等奈美爾安礼母作乎錦毛奈伎布可多衣乃美留乃其等和和気佐我礼流可可布能尾肩爾打懸布勢伊保能麻宜伊保乃内爾直土爾藁解敷而父母波枕乃可多爾妻子等母波足乃方爾圍居而憂吟可麻度柔播火気布伎多弖受許之伎爾波久毛能須可伎弖飯炊事毛和須礼提奴延鳥乃能杼与比居爾伊等乃伎提短物乎端伎流等云之如楚取五十戸良我許恵波寝屋度麻弖来立呼比奴可久婆可里須部奈伎物能可世間乃道
kaze mazipe ame puru ywo no ame mazipe yuki puru ywo pa subye mo na ku samu ku si areba kata sipo wo twori tudusiropi kasu yu zake uti susuropite sipabukapi pana bisibisi ni sika to ara nu pige kaki nadete are wo okite pito pa arazi to pokoropedo samu ku si areba asa pusuma piki kagapuri nunwo kata kinu ari no kotogoto ki sopedomo samu ki ywo sura wo ware ywori mo madusi ki pito no titi papa pa uwe kogoyu ramu mye kwo domo pa kopu kopu naku ramu ko no toki pa ika ni situtu ka na ga yo pa wataru ame tuti pa piro si to ipedo a ga tame pa sa ku ya nari nuru pi tukwi pa akasi to ipedo a ga tame pa teri ya tamapa nu pito mwina ka a nomwi ya sikaru wakurabani pito to pa aru wo pito nami ni are mo tukuru wo wata mo na ki nunwo kata kinu no miru no goto wawake sagar eru kakapu nomwi kata ni uti kake puse ipo no mage ipo no uti ni pita tuti ni wara toki sikite titi papa pa makura no kata ni mye kwo domo pa atwo no kata ni kakumi wite urepe sa maywopi kamadwo ni pa po ke puki tate zu kosiki ni pa kumo no su kakite ipi kasiku koto mo wasurete nuye dori no nodoyopi woru ni itonokite mizika ki mono wo pasi kiru to ip eru ga goto ku simoto toru satwo wosa ga kowe pa ne ya dwo made ki tati ywoba pi nu kaku bakari subye na ki mo noka yo no naka no miti